បាត់ដំបង៖ សមត្ថកិច្ចស្រុកសំឡូត ខេត្តបាត់ដំបង កំពុងតាមរកបុរសម្នាក់ឈ្នោះ សុខ គង់ អាយុ៥៤ឆ្នាំ ដែលបានប្រើប្រាស់អាវុធខុសច្បាប់បាញ់រះបង្អើលពលរដ្ឋកាលពីថ្ងៃទី៦ ខែធ្នូកន្លងទៅ។

សេចក្តីរាយការណ៍ពីសមត្ថកិច្ចបានអោយដឹង កាលពីវេលាម៉ោងប្រមាណ ២០និង០០នាទីយប់ ថ្ងៃទី០៦ ខែធ្នូ ឆ្នាំ២០២១ មានករណីផ្ទុះមួយកើតឡើងនៅចំណុចផ្ទះជនបង្ក ស្ថិតក្នុងភូមិអូរស្ងួត ឃុំតាសាញ ស្រុកសំឡូត ខេត្តបាត់ដំបង។

ដែលករណីខាងលើនេះបង្កឡើងដោយជនសង្ស័យឈ្មោះ សុខ គង់ ជាពលរដ្ឋធម្មតាម្នាក់ដែលបានលាក់ទុកអាវុធខុសច្បាប់ ហើយខណៈដែលស្រវឹងស្រា ទំនងទាស់សំដីជាមួយកូនប្រសារ ក៏បានយកកាំភ្លើងមកបាញ់អស់ជាច្រើនគ្រាប់ បង្កការភ្ញាក់ផ្អើលដល់ប្រជាពលរដ្ឋរួចរត់គេចខ្លួនចូលព្រៃបាត់។

ការផ្ទុះអាវុធនេះ មិនបណ្តាលអោយមានគ្រោះថ្នាក់ដល់នណាម្នាក់នោះទេ។

សមត្ថកិច្ចដែលបានចុះត្រួតពិនិត្យសង្កេតឃើញថា ជនសង្ស័យបានប្រើប្រាស់អាវុធប្រភេទ AK-47 ដោយនៅកន្លែងកើតហេតុសមត្ថកិច្ចបានរកឃើញសំបកគ្រាប់ដែលបាញ់រួចមានចំនួន២១គ្រាប់។

រហូតមកដល់ព្រឹកថ្ងៃទី៨ ខែធ្នូ ឆ្នាំ២០២១នេះសមត្ថកិច្ចនៅមិនទាន់រកឃើញជនសង្ស័យជាមុខសញ្ញានៅឡើយទេ ខណៈដែលរត់ទៅចូលព្រៃក៏យកអាវុធទៅជាមួយផងដែរ៕